06:32
11/18/2017
Այսօր 7...2
am en ru

Նորություններ
Յանա Գրիգորյանը

2017-05-27 14:33

«Դե Ֆակտո » N 131(04/2017թ.) 

2017 սեպտեմբերի 4-ին Մալազիայում կկայանա «Miss Cosmopolitan World» գեղեցկության մրցույթը, որին մասնակցելու է նաև Հայաստանը ներկայացնող Յանա Գրիգորյանը:


Մոդելային կարիերայի դժվարությունների, հեռանկարների և առաջիկա մրցույթի մասին «Դե ֆակտո» ամսագիրը կզրուցի «Miss Cosmopolitan World» գեղեցկության մրցույթի Հայաստանի ներկայացուցիչ Յանա Գրիգորյանի հետ:


-Բավականին դժվար մասնագիտություն եք ընտրել, մշտապես հանրության ուշադրության կենտրոնում եք և անընդմեջ պետք է հետևեք Ձեր արտաքին տեսքին, ինչպե՞ս եղավ որոշումը զբաղվել մոդելային կարիերայով:

 

-Նախ և առաջ ասեմ, որ մոդելային կարիերան ընդհանրապես կապ չունի իմ մասնագիտության հետ, մասնագիտությամբ իրավաբան եմ, ավարտել եմ Երևանի պետական համալսարանը: Ավարտելուց հետո սկսեցի զբաղվել մոդելային կարիերայով, սկզբնական շրջանում մասնակցել եմ մի շարք մրցույթների: Տարիներ առաջ, երբ աշխատում էի այլ բնագավառում, ժամանակ չէի ունենում լուրջ գործունեություն իրականացնել մոդելային ասպարեզում, սակայն այժմ ունեմ և՛ ժամանակ, և՛ ցանկություն զբաղվելու այն աշխատանքով, ինչն ինձ դուր է գալիս: Տարիների ընթացքում հասկացել եմ մի բան, որ յուրաքանչյուրը պետք է զբաղվի այն աշխատանքով, որն իրեն հոգեհարազատ է:

 

-Մոդելի կարիերայի հետ մեկտեղ, նաև երգում եք, դժվար չէ՞ արդյոք համատեղելը:

-Դեռ մանուկ հասակից սկսել եմ երգել, երկար ժամանակ վոկալ դասընթացների եմ հաճախել, այնուհետև կիսատ եմ թողել, քանի որ հայրիկս դեմ էր ընտրածս մասնագիտությանը: Իսկ արդյոք համատեղելը հեշտ է թե դժվար, կասեմ, որ շատ դժվար է, սակայն երբ մարդ ունենում է ցանկություն և նպատակ, ապա, իմ կարծիքով, ամեն ինչ հասցնում է: Իմ բնավորության համաձայն ես երբեք չեմ հանձնվում և ամեն ինչ անում եմ, որ հասնեմ իմ երազանքին:


-Ինչպիսի՞ն էիք պատկերացնում մոդելային աշխարհը և ինչպե՞ս է այն այժմ Ձեզ համար:

-Մոդելային աշխարհը շատ դաժան է, սակայն հարկավոր է հաղթահարել բոլոր դժվարությունները և շարունակել գնալ դեպի քո երազանքը, հենց դժվարություններ են կոփում մարդուն և դարձնում ավելի ուժեղ: Իմ կյանքի ընթացքում ես սովորել եմ հաղթահարել խոչընդոտները և շարժվել առաջ. հարկավոր է ցանկացած իրավիճակում լինել լավատես:

 

-Ըստ Ձեզ` մոդել դառնալու համար միայն գեղեցիկ արտաքին ունենալը բավարա՞ր է: Ի՞նչ հատկություններով պետք է օժտված լինեն մոդել ցանկացողները:

-Միայն գեղեցիկ արտաքին ունենալը բավարար չէ: Իմ կարծիքով մոդել դառնալու համար հարկավոր է լինել պարտաճանաչ, ուժեղ, աշխատասեր, դիմացկուն և բազմակողմանի զարգացած:

 

-Ո՞րն եք համարում հաջողության Ձեր բանաձևը:


-Հաջողության իմ բանաձևը նպատակասլացությունն է, պետք է միշտ ձգտես և հասնես քո նպատակին: Ես համաձայն եմ ԱՄՆ առաջին տիկիններից՝ Բարբարա Բուշի հետ, ով ասում էր. «Դուք անհաջողակ եք Ձեր գործում այնքան. որքան դուք եք մտածում»: Որպեսզի լինես հաջողակ առաջին հերթին հարկավոր է հաղթահարել ներքին անհամոզմունքն ու վախը:

-Մոդելային կարիերայում կա՞ն սկզբունքներ, որոնք չեք ընդունում:


-Կան սահմաններ, որոնք ես չեմ անցնում և կարևոր չէ դա մոդելային կարիերայում է, թե կյանքում: Երբեք չեմ վաճառի իմ սեփական եսը:
Հարկավոր է լինել ազնիվ ինքդ քո հանդեպ. հենց սա է իմ կյանքի առաջնային սկզբունքը:

 

-Հայաստանը դուք եք ներկայացնելու «Miss Cosmopolitan World» գեղեցկության մրցույթում, պատասխանատու է երբ ներկայացնում ես երկիրդ, ինչպե՞ս է տրամադրվածությունը:


-Շատ վճռական եմ տրամադրված և մեծ պատասխանատվությամբ եմ պատրաստվում այդ մրցույթին և հուսով եմ, որ կկարողանամ Հայաստանը պատվով ներկայացնել:

 

-Ապագայի ի՞նչ ծրագրեր ունեք:


-Արդեն ունեմ նոր առաջարկներ մասնակցելու միջազգային մրցույթներին, սակայն այդ մասին կմտածեմ ավելի ուշ:

 

-Ձեզ ի սրտե գալիք մրցույթում ցանկանում ենք հաջողություն:


-Շնորհակալություն հետաքրքիր զրույցի և բարեմաղթանք համար: Ես էլ իմ հերթին Ձեզ ցանկանում եմ հաջողություն և բարգավաճում:
Առիթից օգտվելով ցանկանում եմ շնորհակալություն հայտնել ծնողներիս և նրանց ովքեր իմ կողքին են: Համագործակցության համար առանձնահատուկ շնորհակալություն եմ հայտնում մոդելավորող Արամ Նիկոլյանին, Լիլիթ Մելիքյանին, Տաթև Մանուկյանին, Kokchian Jewelry-ին, Աննա Գրիգորյանին, լուսանկարիչ` Արտաշես Մարտիրոսյանին, ինչպես նաև «Megerian Carpet»-ի ողջ անձնակազմին:

 

Հարցազրույցը` Սյուզաննա Ղուկասյանի



Վերադառնալ