2013-06-26 11:24
«Դե Ֆակտո» 15 (2007թ.)
Ողջու'յն, ընթերցո'ղ բարեկամ, երբ ուղիղ մեկ տարի առաջ լույս տեսավ Դե Ֆակտոյի առաջին համարը, խմբագրության անունից ես խոստացա ընթերցողներին, որ ամսագիրը հավատարիմ կմնա իր անվանը և կորդեգրի անկողմնակալ հայացքով արձանագրել մեր երկրի իրական կյանքի լույս ու ստվերը, պահպանել և խորացնել խոսքի ազատության` արդեն նվաճված տարածքը, առանց դատավորի կեցվածք ընդունելու` ճանապարհ տալ բազմակարծությանը, չվիրավորել մարդու արժանապատվությունը և, որ կարևոր է, տեր կանգնել ազգային և պետական հիմնարար արժեքներին։
Եվ քանի որ ամսագիրը հասարակական-քաղաքական է, հավակնում է դառնալ իշխանությունների և ընդդիմության մեջքին Պասկալի Գոտի։
Բլեզ Պասկալը դեռևս երիտասարդ տարիներին շատ էր նշանավոր, և եվրոպական արքունիքները նրան ընդունում և մեծարում էին որպես մեծ գիտնականի և փիլիսոփայի։ Եվ մի օր Պասկալը վախեցավ, որ ինքը կարող է մեծամտանալ, դառնալ անձնապաստան, և իր համար պատվիրեց մի գոտի, որի վրա փոքրիկ մեխեր էին շարված` սուր ծայրերը դեպի ներս։ Երբ նրան շատ էին գովում, Պասկալը բոլորից աննկատ, արմունկով սեղմում էր գոտին, որ մեխերի ծակոցները սթափեցնեին իրեն։
Ահա այսպիսի խոստումներով մենք սկսեցինք մեր աշխատանքը և դատելով ընթերցողների վերաբերմունքից` խմբագրությանը հաջողվեց կատարել իր առջև դրված խնդիրը… Թեև մեր հավակնությունները շատ մեծ չէին, մեր հետևողականությունը նկատվեց և ընդունվեց հասարակության կողմից, ինչը և մեծագույն գնահատականն է այսօր մեր մի տարվա հոբելյանին։ Շնորհակալություն։
Առայժմ այսքանը, ընթերցո'ղ։
Պարզապես շարունակիր հետևել մեզ…
Բարեկամաբար Մերուժան Տեր-Գուլանյան
Վերադառնալ
