19:40
03/28/2024
Այսօր 7...2
am en ru

Նորություններ
Մեր ժողովրդին առաջին հերթին խաղաղություն եմ մաղթում

2017-01-08 14:50

 «Դե Ֆակտո» N126 (2016թ.)

«Դե Ֆակտո» ամսագրի զրուցակիցն է Քաջարանի քաղաքապետ Մանվել Փարամազյանը

-Պարո՛ն Փարամազյան, շնորհավորում ենք Ձեզ Քաջարանի քաղաքապետի պաշտոնը ստանձնելու համար, կներկայացնե՞ք՝ ինչ աշխատանքային ուղի եք անցել:
-Աշխատանքային գործունեությունս սկսել եմ Զանգեզուրի պղնձամոլիբդենային կոմբինատում: 2003 թ-ից աշխատել եմ Քաջարանի քաղաքապետարանում, որպես իրավաբան: Եղել եմ ավագանու անդամ, մասնակցել հասարակական-բարեգործական ծրագրերի:

-Այսօր ի՞նչ անկատար խնդիրներ կան քաղաքում, որոնք առաջնահերթ լուծման կարիք ունեն:

-Համայնքում անկատար խնդիրները շատ են: Փորձում ենք դրանք դասակարգել ըստ առաջնահերթության և հերթով լուծում տալ բոլոր խնդիրներին: Առաջնային են կանանց համար աշխատատեղերի ստեղծումը, ժամանցային վայրերի՝ այգիների, պուրակների վերականգնման, վերանորոգման խնդիրները, համայնքում սպասարկման ոլորտում մատուցվող ծառայությունների որակական փոփոխության, արդիականացման խնդիրը:

-Ներկայացրել եք քառամյա ծրագիր, կնշե՞ք այն դրույթները, որ ընդգրկված են եղել Ձեր ծրագրում:


-Համաձայն ՏԻՄ օրենքի՝ հնգամյա ծրագիրը պետք է ներկայացնել համայնքի ղեկավարի լիազորությունները ստանձնելուց հետո եռամսյա ժամկետում: Համայնքի ղեկավարի լիազորությունները ստանձնել եմ նոյեմբերի 14-ին, առայժմ զբաղված ենք բյուջեի քննարկմամբ, զարգացման հնգամյա ծրագիրը պատրաստ կլինի սահմանված ժամկետում, իսկ մինչ այդ կլինեն հանրային լսումներ ու քննարկումներ, ինչի արդյունքում ընդունված դիտողություններն ու առաջարկությունները կներառվեն զարգացման ծրագրում: Ծրագրում կներառվեն նաև այն դրույթները, որոնք զետեղված են իմ նախընտրական ծրագրում՝ համայնքի բարեկարգում և կառուցապատում, բնակարանային ֆոնդի արդիականացում, կոմունալ ծառայությունների բարելավում, բնակիչների բարեկեցության ապահովում ու սոցիալական աջակցություն, հոգևոր-մշակութային կյանքի ակտիվացում և այլն:

-Այստեղ բնակչության մեծամասնությունն աշխատում է Հայաստանում գործող խոշորագույն արդյունաբերական ձեռնարկությունում՝ «Զանգեզուրի պղնձամոլիբդենային կոմբինատ» ՓԲԸ-ում, ընկերության գործունեությունը որքա՞ն նպաստավոր է քաղաքի զարգացման համար: 

-Ընկերության գործունեությունը նպաստավոր է ոչ միայն մեր համայնքի և ողջ մարզի զարգացման համար, այլ նաև Հայաստանի Հանրապետության: Համայնքում առկա խնդիրների մեծ մասի լուծումն ակնկալում ենք ԶՊՄԿ-ի աջակցությամբ: Համայնքը ընկերության հետ կապված է փոխշահավետ համագործակցության բոլոր աղերսներով:


-Ինչպիսի՞ն է քաղաքի մշակութային և սպորտային կյանքը:


-Համայնքն ունի արվեստի դպրոց, որտեղ գործում են պարարվեստի, գեղարվեստի խմբակներ, երաժշտական բաժիններ, երգչախմբեր: Քաջարանում գործում է Սպորտի և երիտասարդության հարցերի նախարարության ենթակայության համալիր մանկապատանեկան մարզադպրոց, որտեղ հաճախում է 310 երեխա: Մարզադպրոցում գործում են ըմբշամարտի, բռնցքամարտի, վոլեյբոլի, բասկետբոլի, ծանրամարտի, շախմատի, գեղարվեստական մարմնամարզության խմբակներ: ԶՊՄԿ-ի՝ հիմնովին վերանորոգված, ժամանակակից մարզագույքով կահավորված սպորտային համալիրը և մշակույթի պալատը ծառայում են համայնքի բնակիչների հոգևոր-մշակութային ու մարզական միջոցառումների համար: Քաղաքում լինում են ցուցահանդեսներ, համերգներ, կրկեսային միջոցառումներ: Պետական և եկեղեցական տոները նշվում են պատշաճ մակարդակով:

-Պարո՛ն Փարամազյան, ի՞նչ նոր ծրագրեր եք նախատեսում իրականացնել քաղաքի զարգացման և բարելավման ուղղությամբ

-Առաջիկայում նախատեսվում են արվեստի դպրոցի հիմնանորոգման աշխատանքներ, փակ լողավազանի կառուցում, բնակելի շենքերի մուտքերի լուսավորության ապահովում, կոմունալ ծառայությունների բարելավում, կանաչապատում և ծառատունկ: Գարնանը կվերսկսենք բարեկարգման ու կառուցապատման աշխատանքները:

-Ինչպիսի՞ն պետք է լինի Ձեր պատկերացրած, ինչու ոչ, նաև երազած Քաջարանը:

-Բարեկարգ, բարեկեցիկ, ակտիվ հասարակական առօրյայով, մշակութային, սպորտային կյանքով եռուն, ժպտացող քաղաք:

-Կա՞ որևէ գաղափարախոսություն, որով առաջնորդվում եք կյանքում:

-Պարզապես փորձում եմ չխախտել Աստվածաշնչի Ոսկե կանոնը՝ հուսախաբ չանել մարդկանց, խղճիս հետ հաշտ ու ներդաշնակ ապրել:

-Ըստ Ձեզ, ի՞նչ որակական հատկանիշներով պետք է օժտված լինի անհատը, որպեսզի կարողանա նման պատասխանատու և երկրի զարգացման համար կարևորագույն պաշտոնում աշխատել:

-Օժտված լինի կազմակերպչական հատկանիշներով, գործնական խելքով, պատասխանատվությամբ, եռանդով, ազնվությամբ և վեհությամբ: Համայնքապետը պետք է կարողանա իր անձն ու շահը ստորադասել ստանձնած պաշտոնին, գործի ի նպաստ համայնքի շահերին:

-Պարո՛ն Փարամազյան, շուտով մոտենում են հայերիս կողմից ամենասիրված տոները՝ Ամանորն ու Սուրբ ծնունդը, ի՞նչ կմաղթեք հայ ժողովրդին:

-Առաջին հերթին՝ խաղաղություն, քանզի բոլոր ծրագրերը կարելի է իրագործել միայն խաղաղ պայմաններում, սահմաններում անխաթար անդորր, բոլոր զինվորներին բարի տունդարձ: Ժողովուրդը շատ է համբերել, բայց կրկին համբերություն, համախմբվածություն ու հավատ վաղվա օրվա նկատմամբ, իշխանությունների նկատմամբ, բարեփոխումների նկատմամբ: Լավատեսությունն արդեն իսկ լավ կյանքի երաշխիք է: Եվ վերջապես՝ կյանքի բոլոր ոլորտներում՝ ընտանեկան, հասարակական, քաղաքական հարաբերություններում, փոխըմբռնում եմ մաղթում մեր ժողովրդին:

Հարցազրույցը՝ Սյուզաննա Ղուկասյանի



Վերադառնալ








Խմբագրական
СЕДА ГАСПАРЯН

2020-12-31 13:59

Главный редактор общественно-политического журнала...

Ավելի


Պահոց
ՍԵԴԱ ԳԱՍՊԱՐՅԱՆ

2020-01-08 11:18
ՍԵԴԱ ԳԱՍՊԱՐՅԱՆ «Դե Ֆակտո» ամսագրի գլխավոր խմբագրի պաշտոնակատար...