2014-09-12 10:50
«Դե Ֆակտո» N 99 (2014թ.)
Հմայակ Կարապետյանը սկսած 1992 թվականից աշխատում է «Գրացիա» Կարմիր խաչի վերականգնողական կենտրոնում որպես ֆիզիկական թերապիայի բաժանմունքի կոորդինատոր: Ավարտելով Ֆիզիկական կուլտւրայի հայկական պետական ինստիտուտը, մասնակցել է արտասահմանյան երկրների կողմից (Գերմանիա և այլ)Հայաստանում կազմակերպված տեսական և պրակտիկ դասընթացների ստանալով ֆիզիկական թերապիստի որակավորում: Բազմամյա աշխատանքային փորձ ունեցող մասնագետն այս տարիների ընթացքում օգնել է ֆիզիկական ակտիվ, ինքնուրույն կյանքի վերադառնալ հազարավոր հիվանդների: Թե ինչ է իրենից ներկայացնում ֆիզիկական թերապիան և որքանով է այն զարգացած Հայաստանում, «Դե ֆակտո» ամսագիրը փորձեց պարզել Հայաստանում այս ոլորտում առաջատար մասնագետ համարվող Ֆիզիկական թերապիստ Հմայակ Կարապետյանից, ով վերապատրաստվել և աշխատել է նաև Չինաստանում և Քաթարում:
-Նշեմ, որ ֆիզիկական թերապիան ուղղված է մարդկանց ֆիզիկական առողջությանը, ֆիզիկական ֆունկցիոնալ վիճակի բարելավմանը, ստացած վնասվածքներից հետո ակտիվ և ինքնուրույն կյանքին վերադարձնելուն: Ֆիզիկական թերապիայում նվազեցված է դեղորայքի կիրառմամբ բուժումը: Բուժման այս մեթոդն իր մեջ ներառում է առաջին հերթին ֆիզիկական առողջության գնահատում և բուժման պլանավորում, միջոցներն են. մանիպուլյացիաներ ուղղված ոսկրա-մկանային համակարգերին, մերսումներ, էլեկտրոպրոցեդուրաներ, ֆիզիկական վարժություններ, տարբեր խորհրդատվություններ և այլն:
Համաշխարհային պրակտիկայում Ֆիզիկական թերապիան կիրառվում է բժշկության տարբեր ուղղություններում, որոնցից հիմնականներն են նևրոլոգիական, օրթոպեդիկ, սիրտ-անոթային, մեծահասակների և պալեատիվ: Մեր կենտրոնում հիվանդների նկատմամբ ֆիզիկական թերապիա կիրառվում է դեռահաս տարիքից :
-Որքանո՞վ է Հայաստանում զարգացած ֆիզիկական թերապիան, արդյո՞ք այս ոլորտում մասնագետների պահանջարկ կա:
-Հայաստանում տարեցտարի ոլորտը զարգացում է ապրում: Եթե համեմատելու լինենք բուժման այս մեթոդի կիրառումն այժմ և 20 տարի առաջ, ապա իսկապես տարբերությունը մեծ է: Մեր կենտրոնը հետևում է միջազգային փորձին և փորձում հասնել միջազգային չափորոշիչներին: Չնայած նրան, որ Հայաստանում կան լավ մասնագետներ, սակայն ստանդարտների կիրառման առումով հետ ենք մնում միջազգային փորձից: Այն աշխատանքը, որն իրականացվում է Երևանում, պիտի արվի Հայաստանի ողջ տարածքում: Մասնագետների պահանջ ևս կա, դա լրացվում է Ֆիզիկական կուլտուրայի հայկական պետական ինստիտուտի շրջանավարտների կողմից, ովքեր հանդիսանում են կինեզոլոգիայի բաժնի շրջանավարտներ:
-Ժամանակակից բժշկությունն օրեցօր զարգացում է ապրում և ի հայտ են գալիս բուժման նոր մեթոդներ: Կպատմե՞ք , թե ֆիզիկական թերապիայի ոլորտում ի՞նչ նորամուծություններ են կիրառվում միջազգային պրակտիկայում:
-Այո, բնականաբար նորամուծություններ անընդհատ կան և ամեն օր նոր մեթոդ, նոր մոտեցում է ի հայտ գալիս:
Եթե նախկինում ժամանակակից և տրադիցիոն բժշկությունները հակադրվում էին միմյանց հետ, ապա այժմ գնում են միմյանց զուգահեռ, քանի որ նպատակը մեկն է` օգնել մարդուն ապրել առանց ցավ, լինել առողջ և կարողանալ տնօրինել ֆիզիկական ունակություններն ըստ իր ցանկության:
-Այսօր շատ մարդիկ «դատապարտված են» օրվա մեծ մասն անցկացնել համակարգչի առջև, ինչը ևս կարող է առաջացնել լուրջ ֆիզիկական խնդիրներ: Որպես մասնագետ, ի՞նչ խորհուրդ կտաք գրասենյակային աշխատողներին` հետագայում խնդիրներից խուսափելու համար:
-Նման դեպքերում խորհուրդ եմ տալիս օրվա ռեժիմի մեջ ներառել ֆիզիկական ակտիվության ժամեր կամ րոպեներ: Ցանկալի է, որ դա լինի մարզասրահում, սակայն, անգամ գրասենյակում կատարած մի քանի վարժություններ կկանխարգելեն մկանների գերլարումը: Խորհուրդ կտայի հաճախ կտրվել համակարգչից, ժամը մեկ 5 րոպե հատկացնել ֆիզիկական վարժություններին` օրինակ կատարել կքանիստ: Ընդհանրապես, բոլոր ծնողներին հորդորում եմ, 5-6 տարեկանից սկսած երեխաների մոտ զարգացնել համակարգված ֆիզիկական ակտիվությունը : Բոլոր նրանք, ովքեր համակարգված ֆիզիկական ակտիվություն ունեն, ավելի հեշտ են հետագայում լուծում ֆիզիկական խնդիրները:
-Ֆիզիկական վնասվածք ստացած մարդկանց մոտ բնականաբար ի հայտ են գալիս նաև հոգեբանական խնդիրներ: Արդյո՞ք նրանց տրվում է համապատասխան հոգեբանական օգնություն:
-Բնականաբար, սակայն մեր աշխատանքն իր մեջ ներառում է նաև խոսքը: Վնասվածքից հետո մարդ շատ հարցեր է ունենում և եթե ստանում է մասնագիտական պատասխան ակնկալվող վիճակի մասին, նրա մոտ հոգեբանական բարդույթներ չեն առաջանում կամ ավելի մեղմ են լինում:
-Որքանո՞վ է ֆիզիկական թերապիան Հայաստանում մատչելի և հասանելի:
-Հայաստանում վերականգնողական բուժումը հաշմանդամության խումբ ունեցողների համար կատարվում է պետպատվերով, կան նաև վճարովի ծառայություններ. բուժման ծառայության տարբերակները անհատական են: Կարծումեմ, որ Հայաստանի պայմաններում ֆիզիկական թերապիան այլ երկրների համեմատ մատչելի ծառայություն է:
Հարցազրույցը` Լուսինե Հովհաննիսյանի
Վերադառնալ