2013-06-07 11:17
«Դե Ֆակտո» 54 (2010թ.)
«Արթսուիթ» ընկերությունն այս տարի տոնում է իր հիմնադրման 20 ամյակը։ Ընկերությունը տարեցտարի ընդլայնվող իր անուշահամ տորթերի, թխվածքի և քաղցրավենիքի լայն տեսականիով, բարձր որակով և յուրահատուկ դիզայնով` հանդիսանում է առաջատարներից մեկը հրուշակեղենի արտադրության ոլորտում։
«Արթսուիթ» ընկերության հիմնադիր տնօրեն Նաիրա Բալասանյան
-Տիկի՛ն Նաիրա, ե՞րբ և ինչպե՞ս որոշեցիք գործունեություն ծավալել հրուշակագործության բնագավառում։
-1990թ.-ն էր, երբ արդեն ավարտել էի թեկնածուական դիսերտացիայի գործնական մասը և կայացել էր նախնական պաշտպանություն։ Մասնագիտությամբ քիմիկոս եմ, սակայն այդ դժվարին տարիներին էլեկտրաէներգիայի բացակայությունը գրեթե անհնարին էր դարձրել լաբորատոր աշխատանքների իրականացումը։ Ուստի, քանի որ չէի կարող մնալ անգործ` որոշեցի սեփական գործունեություն ծավալել։ Չմոռանանք, որ քիմիան համարվում է նաև գիտական խոհանոց, որը ինձ բավականին հոգեհարազատ է. այդ է պատճառը, որ ընտրեցի հենց այս ոլորտը։ Սկզբնական շրջանում թխվածքի արտադրությամբ զբաղվելը լուրջ բնույթ չէր կրում, սակայն սպառողի պահանջը ստիպեց վերջնական ընտրություն կատարել քիմիայի և հրուշակագործության միջև. փաստորեն վերջնականապես հրաժեշտ տվեցի քիմիային, որի համար այսօր և՛ ափսոսում եմ, և՛ ոչ։ Սկսեցի ավելի լուրջ վերաբերվել ձեռնարկածս գործին, և 20 տարիների աշխատանքի արդյունքն այսօր արդեն ակնհայտ է` «Արթսուիթ» ընկերությունը տորթերի և թխվածքի արտադրության բնագավառում առաջատարներից մեկն է։ Ներկա դրությամբ ընկերությունն արտադրում է ավելի քան 60 անուն խմորեղեն, ինչպես նաև ունի թեմատիկ տորթերի անսահման մեծ տեսականի։
-Ո՞րն է Ձեր ընկերության առանձնահատկությունները, և ինչո՞վ եք տարբերվում շուկայում գործող մյուս ընկերություններից։
-Շուկայում տարբերվում ենք տորթերի ու թխվածքի ինչպես դիզայնի, այնպես էլ համի հաճախակի փոփոխմամբ։ Յուրաքանչյուր դիզայնի փոփոխմամբ, փոխվում է նաև համը, որին զուգահեռ, իհարկե, աշխատում ենք միշտ բարձր պահել որակը։ Կրեմային արտադրանքի թարմության հարցում սպառողների կայուն վստահության համար նպատակահարմար ենք գտել մեր ապրանքատեսակների իրացումը կազմակերպել միայն «Արթսուիթ»-ի ֆիրմային խանութներում։ Իսկ խմորների ու կրեմների հատուկ բաղադրատոմսերը մշակված են իմ կողմից։ Օրինակ` այսօր բոլորին հայտնի «Կարալ» թխվածքը ստեղծել եմ ես, սակայն այն արդեն առաջարկվում է գրեթե բոլոր սրճարաններում և խանութներում։
-Դիզայներները, մասնագետներն որքանո՞վ են պրոֆեսիոնալ և արդյո՞ք բարեխիղճ են։
-Բոլոր մասնագետները բավականին պրոֆեսիոնալ և բարեխիղճ են։ Տորթերի դիզայնի վրա աշխատում են պրոֆեսիոնալ նկարիչներ, ովքեր ավարտել են Երևանի պետական գեղարվեստի ակադեմիան։ Նրանք կարող են տորթերի վրա նկարել ցանկացած մարդու դիմանկար, ցանկացած պատկեր, ինչ ցանկանում է հաճախորդը. ցանկացած մտահղացում իրականություն կարող է դառնալ մեր փորձառու մասնագետների կողմից։
-Ունե՞ք աշխատանքային սկզբունքներ։
-Արտադրական գործընթացն իրականացվում է առանձնացված ընթացակարգերով` մաքուր և հարմարավետ պայմաններում։ Ինձ համար աշխատանքային առաջնային սկզբունքը աշխատանքի մեջ սանիտարահիգենիկ կանոնների պահպանելն է, որը մեր արտադրամասում խիստ է դրված. բոլորն աշխատում են համապատասխան համազգեստով և պարտադիր կրում են գլխարկներ ու ձեռնոցներ։ Բոլոր աշխատակիցները պարտադիր պայմանով պարբերաբար անցնում են նաև բուժստուգումներ։
-Տիկի՛ն Նաիրա, երկու ամիս է ինչ բացել եք խանութ-սրճարան։ Ո՞րն էր սրճարան բացելու նպատակը։
-Նոր խանութ-սրճարանի բացման հիմնական նպատակն է` էլ ավելի ընդլայնել սպառման ցանցը, որպեսզի ավելի մատչելի և հասանելի լինենք բոլորին։ Սրճարանում կարող են ճաշակել ոչ միայն ֆիրմային թխվածքի լայն տեսականի, այլև փորձառու խոհարարների կողմից պատրաստված պիցցաներ, սենդվիչներ, «ռուսական» կարկանդակներ, նրբաբլիթներ և աղցանների լայն տեսականի։ Օգտագործում ենք թարմ, տեղական մսամթերք, ըստ որի` ավելի է բարձրանում առաջարկվող տեսականու պահանջարկը։
-Մրցակցային դաշտն ինչպիսի՞ն է, կա՞ն այս բնագավառում լուրջ մրցակիցներ։
-Այս ոլորտում չի կարելի ասել` մեկը մյուսից առավել կամ պակաս է։ Բոլորը փորձում են իրենց արտադրանքը պահել որակական և համային բարձր մակարդակի վրա։ Արտադրանքի որակի ապահովման կարևոր գործոն է բարձրորակ հումքի ընտրությունը։ Մենք միշտ աշխատում ենք նույն մատակարարների հետ և պարտադիր պահանջում ենք որակի սերտիֆիկատ։
-Ո՞րն է Ձեր ընկերության կարգախոսը։
-«Արթսուիթ» ընկերությունն իր յուրահատուկ ձևավորմամբ և համային անկրկնելի հատկանիշներով ընդունել է իրեն համապատասխան կարգախոս` «երբ գեղեցիկն այսքան անուշ է»։
-Տիկի՛ն Նաիրա, իսկ Ձեզ համար, որպես կին, դժվար չէ՞ ստեղծել և ղեկավարել բիզնես։
-Կյանքում դժվար է ամեն ինչ։ Կարծում եմ` դժվարությունը մարդու համար է և այն պետք է հաղթահարել նպատակաուղղված աշխատանքով. չէ՞ որ արդյունքը միշտ հանում է հոգնածության զգացումը և դրական զգացողություններով պարուրում քեզ։
-Ո՞րն եք համարում Ձեր հաջողության գրավականը։
-Ես մշտապես օգտվում եմ գրականությունից, շատ հետևողական եմ բոլոր հարցերում, բծախնդիր եմ հումքի ընտրության մեջ և միշտ հետևում եմ բոլոր նորամուծություններին։ Մեր հաջողության ամենամեծ ապացույցը` հաճախորդների գոհունակ ժպիտներն ու շնորհակալական խոսքերն են։
-Ինչպե՞ս ազդեց տնտեսական ճգնաժամը Ձեր ոլորտի վրա և ինչպե՞ս դիմակայեցիք ճգնաժամային պայմաններում։
-Իհարկե, ինչպես բոլորի, այնպես էլ այս ոլորտի վրա այն մեծ ազդեցություն ունեցավ։ Սակայն ի տարբերություն շատ ընկերությունների` ես այդ ճգնաժամային պայմաններում նախընտրեցի ստանալ ավելի քիչ եկամուտ, բայց անփոփոխ պահել «Արթսուիթ» ընկերության աշխատակազմը։
-Բոլորի մոտ կա կարծիք, որ ավելի լավ է ուտել տան պայմաններում պատրաստածը, քան դրսից գնածը։ Դուք ինքներդ ինչպե՞ս եք վերաբերվում նման կարծիքներին։
-Դա այդպես չէ, օրինակ մենք մեր արտադրանքի մեջ սկզբունքորեն չենք օգտագործում որևէ քիմիական հավելում, և եթե ես իմ պատրաստած հրուշակեղենը չուտեմ, հետևաբար այն չեմ առաջարկի գնորդին։ Ցանկացած պահի ես պատասխանատու եմ մեր ընկերության յուրաքանչյուր արտադրանքի համար և միշտ ամեն ինչ անում ենք, որպեսզի որակը գերազանցի գնին։
-Ապագայի ի՞նչ ծրագրեր ունեք։
-Քանի որ այսօր մեծ ուշադրություն են դարձնում արտաքին տեսքին, ուստի փորձում ենք էլ ավելի եվրոպականացնել արտաքին տեսքը` միշտ բարձր պահելով որակը և համը։
Հարցազրույցը` Լուսինե Գրիգորյանի
Վերադառնալ